葉劉投訴游清源玩針對

【明報專訊】前晚有線電視嘅選舉論壇上，新民黨葉劉淑儀被社民連支持者話係「掃把頭」，葉太氣憤叫佢哋「返幼稚園啦」。此言一出，唔少人嘩然，葉太噚日同Emily講，若有人話佢喺論壇好惡，佢覺得好唔公道，皆因現場佢不單被人民力量、社民連支持者人身攻擊，更遭論壇主持人之一游清源處處針對，因此佢唔大聲講嘢係唔得嘅咁話。


疑影射「掃把頭」 葉太：不能接受

葉太話，前晚去到論壇，現場已粗口橫飛，「好似仆×、食屎、掃把頭」等不絕於耳，加上其他候選人圍攻，佢要大聲講嘢先至可以交代自己嘅立場，「（公民黨）陳家洛都變咗啦，上次佢太溫文，出唔到自己嘅point，今次咪好惡囉」。


不過，葉太話令佢最嬲嘅，係論壇主持人之一游清源提問時事事針對，臨尾總結時，仲話好多候選人現形，例如「好耐無做掃把頭嗰啲呢，就做番掃把頭」。葉太噚日分別去信有線電視同選舉事務處投訴，話游清源出言侮辱，不能接受。嚟緊仲有兩場論壇，其中一場會喺遮打花園舉行，葉太估計到時都係混亂，「咁多閒雜人等可以嚟」。


游清源﹕無唔公道

游清源噚晚仍有主持論壇，被幾個九西候選人質疑佢不公道。佢同Emily講，若有人認為佢人身攻擊，佢會反省，而佢係以獨立同嘉賓身分主持論壇，問啲選民想問嘅問題，唔同意自己係唔公道。港島候選名單仲有勞永樂、劉嘉鴻、許清安、單仲偕、王國興、吳文遠、何秀蘭、何家泰、鍾樹根、曾鈺成、劉健儀、吳榮春。