臨記公司搵上自由黨

【明報專訊】有線電視喺戶外搞選舉論壇，各候選人都忙於動員以振聲勢。話說自由黨李梓敬日前喺facebook呼籲支持者出席今晚嘅新界東論壇，點知15分鐘之後，馬上收到臨記公司嘅電話，問自由黨是否需要佢哋「伸出援手」咁話。


李梓敬話，對方一打嚟，只係自稱係「臨記公司」，連公司名都唔講，唔排除係有人睇死自由黨動員能力唔夠，存心玩嘢喎。佢話，自由黨嘅支持者多係沉默居多，肯出席呢啲論壇嘅唔夠激進派多，但一定唔會咁無骨氣搵臨記撐場。


自由黨：對方拒說公司名

自由黨田北俊喺新東嘅支持度唔錯，但聽講近日有人向唔少地區人士放風，話田少已經夠票，叫佢哋轉投其他人。自由黨話2008年選舉時已經因為呢個原因而「高開低收」而落敗，希望支持者唔好誤信流言喎。


田少被傳夠票 籲支持者勿信流言

參選新東嘅名單仲有湯家驊、梁國雄、陳克勤、劉慧卿、張超雄、葛珮帆、黃成智、葉偉明、龐愛蘭、方國珊、陳志全、范國威、龐一鳴、蔡耀昌、邱榮光、陳國強、何民傑、梁安琪。