廖長江以後瞓少啲

【明報專訊】立法會選情激烈，但70席中，已有16人喺所屬嘅功能界別無競爭對手下自動當選，包括商界（二）、即係中華總商會嘅界別嘅廖長江（Martin）。噚日Martin同中總會長蔡冠深見記者，講到未來嘅議會工作。本身係大律師嘅Martin積極準備議會工作，目前已刨緊議事規則，佢聲明日後唔會做全職議員，但承諾會盡量平衡議會同專業，笑言自己要瞓少啲。


本身係全國人大代表嘅Martin話，喺議會除咗支持政府依法施政，亦會維護公眾利益，強調對政府政策係應支持就支持，應反對就反對。喺特首選舉上提名唐英年嘅Martin話，同梁振英亦係多年朋友，欣賞對方能力，但自己唔係「梁粉」。


對於國民教育科，Martin覺得係應該推行，自己都係家長，好明白家長關注組嘅憂慮，但佢覺得唔應該因為有偏頗嘅教材，就將成個科目取締，立即叫停唔係最好嘅方法，相信3年開展期可以累積經驗，喺檢討同評估後再作定斷。