何CC支持何姨姨

【明報專訊】唔少候選人都出動藝人牌，希望可以吸引更多選民投票畀佢哋，民主派方面，除咗達明一派黃耀明多次出席公民黨陳淑莊嘅活動撐對方，噚日工黨何秀蘭亦得到歌手何韻詩（HOCC）支持。


何韻詩為何姨姨拍咗一段約1分半鐘嘅短片，佢提到社會有好多唔同種類嘅人，關心嘅事都唔一樣，佢覺得人生而平等，無理由分富有程度、種族、身分地位，或者唔同性取向。佢問市民，如果要爭取一啲事、甚至知道燒到埋身時，究竟有無人會為少數發聲？


讚何秀蘭有做足功課

何韻詩話，喺立法會內，應該有議員為唔同嘅少數爭取佢哋應有嘅權利，佢覺得何秀蘭大部分嘅工作都係為唔同群眾爭取權利，喺議會內提出任何一個問題時，都可以睇到佢有做足功課，所以佢會選擇何秀蘭咁話。


港島區其他候選人有許清安、單仲偕、勞永樂、劉嘉鴻、鍾樹根、吳榮春、葉劉淑儀、王國興、陳家洛、何家泰、曾鈺成、劉健儀、吳文遠。