資訊自由問卷建制唔覆獨媒

【明報專訊】民間新聞網站獨立媒體（香港）上月16日起，用電郵同郵寄致函立法會選舉所有候選人，問佢哋對言論及資訊自由嘅立場。民建聯、工聯會、自由黨、新民黨等建制派冇回覆，16名功能界別自動當選人亦係「零回覆」。獨媒倡議幹事方鈺鈞話要譴責建制派，又話有競爭先逼到候選人面對選民。


纏擾刑事化分歧大

獨媒收到37張地區直選名單及15名功能界別候選人回覆，回覆率分別係55%及25%，多屬泛民候選人。回覆佢哋嘅候選人，全部同意訂立資訊自由法，大部分贊成開放大氣電波、訂立檔案法、豁免二次創作等。不過，問到政府之前建議將纏擾行為刑事化，候選人幾大分歧，贊成反對各半。


參選體育、演藝、文化及出版界嘅蕭思江，佢意見比較特別，唔同意廢除功能界別同檢討公安法，對開放大氣電波、發免費電視牌無意見，佢話支持言論自由，但要顧其他人感受，又話自己61歲，年紀大，比較保守，諗法唔同其他人。其他候選人有馬逢國同周俊輝。