醫藥股票基金表現省鏡

【明報專訊】人稱「強迫金」嘅強積金今年繼續冇咩起色，理柏全球基金分類最新數據顯示，截至8月的過去一年平均回報對比上年同期仍然錄得負數，係-0.66%，以年初至今嚟計的話反而有4.83%。供強迫金供得咁辛苦但最後都要蝕少少，都真係幾無奈。不過家下經濟唔好，跌唔夠1%可能已經係不幸中之大幸，睇下恒指一年來嘅回報仲差，得-1%，所以強迫金都叫做勉強跑贏大市啦﹗


不過仔細睇下的話，強迫金嘅某啲基金組合最近其實表現不俗，股票類當中，醫藥及健康護理股票表現得最好，年初至今嘅回報就有一成五咁多。第二高回報嘅係美國股票，都有11.4%。


經濟差嘅國家反而有金執

至於包晒尾嘅就係日本同埋中國股票喇，分別喺-0.02%同埋-2.38%，雖則歐洲經濟唔多掂，但人哋個股市都表現得好過佢地，有差唔多8%嘅回報。所以各位打工仔為自己選擇退休金組合時，都要小心「陷阱」，嗰啲經濟比較差嘅國家，可能真係會估佢唔到，反而有金執﹗


不妨考慮轉投資組合

混合型基金方面，靈活混合型嘅回報最好，有6.19%，港元進取混合型都唔差，有得賺6.07%。下次可以轉退休金投資組合時，不妨都考慮下呢啲表現唔錯嘅基金，免得蝕咁多嘛﹗


email:piano@mingpao.com