機場飛行棋 玩法似UNO

【明報專訊】每逢遇上颱風、雷暴惡劣天氣，機場運作肯定受影響，隨時要重新編排受影響嘅航班升降。為咗畀更多市民、特別係小朋友明白機場跑道運作，機管局聯同理大，喺今年初開始以機場跑道為設計藍本，自家製作咗一副「飛行棋」，名為「機不可失」，希望大家可以喺遊戲中學習。


同埋理大合製

噚日機管局邀請Emily等一眾行家試玩，未開始玩時，齋睇副棋已經見到機管局嘅設計心思﹕入面無論遊戲板，抑或飛機造型嘅棋子都非常可愛。至於玩法，就有啲似飛行棋加「UNO」，玩家會獲分到兩架飛機棋子，要安排飛機喺南北兩條跑道升降，每次升降都會拎到「星星」分數，最先獲得10粒「星星」就當贏。機管局話，呢副棋只係整咗幾百副，仲未有得賣，一般會喺學校或非政府機構參觀機場時當紀念品贈送，市民想買，要睇機管局會唔會大量製作喇。