陝西研究所入侵卿姐電郵？

【明報專訊】民主黨副主席劉慧卿嘅電郵又被入侵！上禮拜四，卿姐助理用緊電郵時，戶口突然登出，仲要畀人改埋密碼。卿姐重設號碼後，翌日竟出現同樣情况，連用嚟驗證嘅後備手機號碼都畀人改埋。查番IP地址，入侵竟然來自陝西省西安市嘅「電信科學技術第十研究中心」。


網民：從事「涉密行業」

卿姐話，團隊曾喺網上搵過呢間「研究中心」嘅資料，不過就唔多見，只係喺「天涯網」見到有網民話呢間「十所」係做「涉密行業」，領導之間嘅內鬥亦好嚴重咁講。


至於卿姐電郵畀人入侵，已經唔係第一次，不過戶口用用吓畀人入侵就未試過。今次亦正係因為確切知道入侵時間，所以先至搵到個攻擊地址。


卿姐話，助理已向警方報案，但相信事件只係「冰山一角」，呼籲網民如果電郵戶口畀人入侵，要向警方舉報。新東候選名單仲有梁國雄、葉偉明、梁安琪、龐愛蘭、葛珮帆、陳志全、邱榮光、陳克勤、張超雄、蔡耀昌、范國威、田北俊、黃成智、湯家驊、何民傑、龐一鳴、方國珊、陳國強。