5個替身幫嫻姐走勻全港

【明報專訊】循超級議席出選嘅工聯會陳婉嫻被喻為吸票機器，面對其他參選團隊告急，仲要周圍散播「嫻姐已經夠票」信息，嫻姐唔嬲就假，佢日前就不點名話民建聯李慧琼「好茅、好不君子」，事件曝光後就收到更多信息，話原來好多區、屋邨都有人散播同樣信息，向嫻姐報料嘅團體就話，已經喺區內「掃毒」，以防被人有機可乘。


不點名話李慧琼「好不君子」

嫻姐噚日講起件事仍然好着緊，話明白選舉緊張，但警告發放呢個信息嘅團隊，「呢次咁樣講完，大家就永遠記得你講過大話」，不過嫻姐好厚道，只係話有多於一個政團咁做，唔想用「政治道德」有問題去形容佢哋。


嫻姐人氣強勁，工聯會其他直選團隊都爭住搵佢拉票，而佢本身亦要走勻全港各區。眼見選舉日愈來愈近，嫻姐就整咗5個有佢卡通頭像嘅公仔，等義工拎住落區，令佢嘅「分身」可以走到各區繼續拉票，不過呢個公仔連埋支鐵通，就重達30磅，相信義工帶埋佢落區，只可以企喺度拎住，難以周圍走喇。呢個「卡通嫻姐」每隻要成4000幾蚊，對比其他候選人出動紙牌公仔貴好多倍。


餅印妹妹唔肯做替身拉票

嫻姐話佢細妹其實同佢好似樣，想叫對方扮佢落區幫手拉票，但細妹婉拒做替身。超級議席候選人仲包括何俊仁、涂謹申、白韻琹、劉江華、馮檢基。