京東蘇寧國美打假波

【明報專訊】上個月內地京東、蘇寧同國美（0493）掀起一場家電減價戰，唔單止吸引媒體眼球，原來連國家發改委都有關注，發改委價格監督檢查和反壟斷局仲派咗三個調查組，分別向三家公司進行調查，而且初步認為佢哋呢場減價戰可能涉及欺詐四宗罪。


遭反壟斷局捉到罪證

小琴八卦到，呢四宗罪當中，首先係托高原價先至再減價促銷，實際上促銷嘅售價仲貴過以前；另外嗰啲超低價產品，話就話缺貨，但其實倉庫實際仲有存貨；仲有就係嗰三家家電商，其實賣嘅產品種類好少重疊，所以根本無得比較呢啲獨家經營產品係咪最低價發售；最後，京東響長開減價戰時曾經話未來3年內會保持零毛利，之不過抽查發現，部分產品即使減咗價，最高毛利率都達到10%。


發改委話，佢哋家仲繼續了解緊情况，雖然家未有具體結論，亦未決定會唔會處分，但一定會依法辦事咁話。相信呢三家家電商點都估唔到，搞減價戰終於搞出個大頭佛了。


email:piano@mingpao.com