推「議員表現錄」app

【明報專訊】立法會選舉在即，過去冇乜留意候選人政績？家啲候選人個個都話告急，怕配錯票，分分鐘嘥咗手中一票？唔緊要！事關中大研發咗個手機app，仲有facebook嘅「全城配票」，唔單止幫大家了解候選人政績，仲可以了解朋友圈子入面嘅投票意向，做到大規模配票咁話。


列政績投票紀錄

呢個叫「議員表現錄」嘅app，綜合晒立法會議員過去4年嘅地區工作，連邊個議員喺邊個議案投贊成定反對票都一目了然。構思應用程式嘅中大政治與行政學系助理教授黃鶴回話，立法會公開資料唔方便市民閱讀，佢哋做資料蒐集，動員10個人，花咗幾個星期先完成，希望個app可以幫選民認識候選人。iPhone同Android用戶可以分別喺app Store同學系網頁下載程式。


中大研發嘅另一個facebook應用程式「全城配票」，今日開始畀市民表達自己想投邊個，每日可以轉一次選擇，程式會統計朋友之間嘅投票意向。咁大家就可以睇實選情，再同朋友分工合作配票，提高心水候選人、政黨嘅勝算啦。