CY投票不離小圈子

【明報專訊】特首梁振英（CY）同多個政府高官噚日以身作則，呼籲市民投票。今年人人有兩票，CY之前無更改選民資格，繼續投畀傳統功能界別，而未去參加有超過300萬登記選民嘅「超級區議會」議席投票，噚日仲拎住選票擺入紅色箱（代表功能界別）度等記者影相。不過，律政司長袁國強都一樣繼續支持佢所屬界別，喺法律界功能組別投票。特首辦發言人證實，CY係投咗建築、測量及都市規劃界，但對於係咪代表佢唔支持超級議席呢？發言人話無補充。


市民追擊蓋過CY把聲

面對國教科引起嘅風波，噚日CY投票後接受訪問時亦畀市民追擊，有人更高叫「最無恥呀，梁振英」、「梁振英大話精」、「撤回國民教育」等，聲線仲冚過咗CY把聲。


除咗CY，近日都有就國教科事件解畫嘅政務司長林鄭月娥，噚日朝早8點就去咗香港仔投票，佢同大部分港人一樣，都係屬於超級區議會組別選民。至於財政司長曾俊華，由於要代表CY去俄羅斯海參崴參加APEC會議，今屆肯定無得投票喇。


署理財政司長陳家強就去咗跑馬地投票，佢話國教科事件唔會影響本港國際金融中心嘅地位，並且話本港係一個自由、多元化嘅社會，已得到好多國際媒體認同。袁國強同政制及內地事務局長譚志源則分別去咗淺水灣同半山區投票。