唐唐談國教：小心魔鬼細節

【明報專訊】久未露面嘅前政務司長唐英年同太太郭妤淺噚日到半山投票站投票，仲大談特首梁振英就國教科讓步一事，暗諷梁振英讓步唔夠快，佢話新政府有責任檢討上屆政府嘅政策，好似置安心咁都好快改咗，國民教育科亦係一樣，認為政府要聽民意，有需要就修訂。


唐唐又讚反國教科嘅年輕人維護香港核心價值，對佢哋嘅承擔同衝勁感敬佩。佢話今次爭議嘅問題唔係出於國民教育，而係教材點制訂，魔鬼往往喺細節裏面，點樣制訂全面、深入、客觀、持平嘅教材先最重要。至於特首選舉期間被揭發僭建，唐英年話繼續配合緊屋宇署調查，被問梁振英當選後亦被揭發大宅僭建，佢有冇覺得唔甘心，唐唐就話已收拾心情，唔會追究。唐唐仲話「會按住自己嘅良心投票」，寄望每個議員當選後都緊記「香港精神」係香港嘅核心價值。