哈囉喂溪錢蛋糕迎賓

【明報專訊】踏入9月，又係主題樂園嘩鬼出籠時。海洋公園「十月全城哈囉喂」會喺9月21日至10月31日嘅部分日子舉行，餐飲部率先研製咗多款美食，個樣夠晒嚇人，但食落唔錯！Emily噚日去試菜，主菜唔係鬼手就係骷髏頭，其實係烤雞煙肉卷同三文魚卷配薯仔嚟嘅；而南瓜釀野菌意粉整嘅「大頭怪嬰」就啱晒素食者。最特別係餐廳已被「鬼侍應」佔領，點菜上菜都由佢哋包辦，Emily都畀班爛面鬼嚇一嚇！


今年公園仲新增哈囉喂下午茶自助餐，逢周日喺海龍王餐廳供應。如果嫌大餐太飽，可以去小食亭試吓「木乃伊熱狗」、「寶燭腸」。如果有朋友仔生日，仲可以去水都餅店買個「溪錢蛋糕」（圖）或「棺材蛋糕」賀賀佢