白姐姐：唔想同Paul分開 無得做議會鴛鴦

【明報專訊】參選超級區議會嘅白韻琹，雖然只係取得6萬幾票包尾收場，但佢噚日仍然盛裝赴會滿場飛。記者準備訪問白姐姐參選感受時，佢仲拉住佢嘅另一半、喺九龍東成功當選嘅謝偉俊，話要佢陪住至得，仲爆咗句：「我唔想同你分開一陣」，搞到記者都打咗個冷震！
白姐姐話自己攞到6萬票已經算唔錯，事關佢8月先開始落區，比起其他上年已「偷步」部署嘅政黨遲喎。咁白姐姐失驚無神落場玩超級區議會，係咪有心「走」民建聯劉江華嘅票令佢落選呢？白姐姐就話呢個係一個好錯嘅講法，事關啲選票唔係任何人嘅，大家應該尊重選民嘅決定。
田大少未必同細佬合作
白姐姐無緣同謝偉俊做議會鴛鴦，但田氏兄弟——自由黨田北俊同細佬新民黨田北辰就會喺議會相見喇。被問會唔會加緊同新民黨合作，田大少就話，雖然新民黨同自由黨嘅理念差唔多，亦係主攻中產票，但認為好多議題都唔一定要跨黨傾喎。