新聞類別
財經
詳情#
【明報專訊】最近雅天妮（0789）因為非執行主席謝超群涉毒兼送入醫院精神科，一齊白手興家嘅太太葉英琴接掌行政總裁一職之餘，又單方面申請離婚，結果噚日公司開股東大會就引來大批傳媒，但事後唔少行家抱怨唔單止領導層冇出來解畫，仲搞到全部行家逼響一個冇冷氣嘅工廈走廊成兩粒鐘，慘過焗桑拿。
聽行家講番，雖然佢哋都預咗葉英琴噚日唔會見傳媒，但冇諗到公司會咁安排。佢哋搵保安封住門口，要記者響走廊呆等，又冇任何職員同大家交代，結果響冇冷氣嘅情况下，廿幾個行家又唔敢離開，唯有齊齊大汗疊細汗咁等，唔夠半個鐘，走廊已經隱約可以嗅到一陣陣汗味。
領導層冇解畫 走廊變桑拿室
雖然係咁，雅天妮啲人就闊佬懶理，反而工廈職員見班記者咁辛苦，搵嚟兩把風扇稍稍為大家降溫，但焗桑拿都真係有個限度，最後再三要求下，只有雅天妮秘書覃家寶走出嚟講兩句，話公司運作正常，管理層冇申請停牌，謝超群仲響醫院治療，同埋股東會冇董事要求謝超群離任。仲有個自稱買咗十幾萬股嘅小股東尹先生話，雖然人哋有家事，但自己就對公司抱有信心喎。
樓下報檔主﹕謝超群5月曾現身
反而散會後，行家響雅天妮樓下嘅報攤買紙巾抹汗時，響檔主口中仲知得更多，個檔主話，5月嗰陣仲見過謝超群，謝生仲買過飯盒請佢食，覺得佢幾好人，唔覺得佢有咩病。如果小琴冇記錯，雅天妮響2月嗰陣就已經出過通告，話謝超群因病休假，5月就再公布佢已經康復兼復職，同檔主所講嘅都好脗合喎。
email:piano@mingpao.com
回應 (0)
