杯葛入票站工黨山寨舞台謝票

【明報專訊】工黨李卓人、何秀蘭、張超雄，噚日清晨同埋一班助選團拉大隊去到機場亞洲博覽館嘅中央點票站，諗住齊齊入場睇選舉結果公布，但原來公眾席得1000個座位，先到先得，在場職員話公眾席爆滿，唔畀工黨助選團入去，有其他候選人包括龐一鳴嘅助選團同樣食閉門羮。


公眾席爆滿 助選團拒門外

李卓人佢哋當然唔滿意，即時跟保安同職員理論；助選團更一度鼓譟，大叫「開路」，又同保安發生推撞，推開鐵馬，幾十個警員到場增援，築成人牆維持秩序。最後職員讓步，畀每個候選人帶兩名助選團入去點票站。


不過李卓人唔滿意呢個安排，話裏面有政黨都帶咗幾十個助選團入去，非常唔公平。李卓人、何秀蘭同張超雄決定杯葛入場，淨係睇場外嘅電視直播。佢哋仲好有創意，索性喺場外擺幾張櫈，搭咗個臨時舞台，每當場內宣布有成員當選，佢哋就企上張櫈度，向助選團謝票，接受支持者獻花，儼如一個山寨版選舉新聞中心。