蘇富比下月拍賣國畫

【明報專訊】今年好多公司睇淡市道。要下半年生意好翻啲，睇怕都要拜多幾次大仙祈下福至得。但偏偏有啲公司，縱使身處亂世仍淡然自若，頗有中國水墨畫表現嘅仙風道骨。佢就係正在準備拍賣中國水墨畫既蘇富比。


蘇富比中國書畫部主管張超群覺得，拍賣會受市道差嘅影響唔大，「如果係心頭好，見到就會買啦！」佢話拍賣會受好多不確定因素影響，經常不經意間拍賣價又會創新高。


蘇富比中國書畫秋季拍賣會將於10月8日舉行，呢次徵集咗325件作品，總估價近1.7億元。國畫大師張大千嘅《擬唐人秋郊攬轡圖》估值880萬元，全場最高。畫嘅主體係臨摹趙孟頫嘅舊畫，背景就按照自己嘅思路畫得更加繁複。小琴覺得大師嘅畫真係夠內涵，換個背景就已經賦予幅畫新嘅生命。唔似我地，想換背景，就淨係識photoshop。