黃洋達自認唔啱政黨政治

【明報專訊】喺九龍東落選嘅黃洋達，選舉期間一直打住人民力量嘅旗號，但選舉啱啱落幕，佢前日就喺網上留言話自己根本唔支持人民力量，惹來非議。事隔一日，黃洋達喺fb澄清，話自己唔係同人民力量反面，只係唔適合政黨政治，所以表明唔想加入「政黨化」後嘅人民力量啫。


fb澄清唔係反面

黃洋達同黃毓民商討後決定，佢自己成立嘅「熱血公民」，往後會重點進行政策研討同舉辦座談會，言下之意，似乎會同人民力量各行各路。佢又就呢次風波致歉，希望大家唔好截取一句半句大做文章咁話。


另外，同「慢必」陳志全一齊參選新界東嘅袁彌明，前日喺facebook不點名批評黃洋達，指有反骨仔選舉過後馬上現形。事隔一日，人民力量主席劉嘉鴻喺facebook留言，強調人民力量嘅發言人只有4個，即係佢自己同副主席甄燊港，以及兩名立法會議員黃毓民、陳偉業，奇就奇在無咗將會係議員嘅慢必喎，唔通人力唔想慢必同袁彌明多嘴？


慢必袁彌明無份做發言人

袁彌明就同Emily講，佢唔覺得上述言論係針對佢，又話自己無受壓力、無被噤聲喎。