立會開雞精班

【明報專訊】立法會選舉啱啱完，一眾當選者又要準備開會，呢班候任議員聽日可以去立法會實地視察；而下禮拜一連4日仲有秘書處安排嘅雞精班，相信可以幫班新丁議員盡快熟習議會運作。


座位表未搞掂

除咗上堂，70個議員嘅座位表，都係家要解決嘅問題，唔少當選者已經收到秘書處通知，話按慣例先由議員自己醞釀一下，大政黨就有得優先揀位，其他人就要將就一下喇。喺以往，大家都有共識，泛民、建制各自坐，新民主同盟范國威就笑言，佢呢啲一人黨最無所謂，只要同泛民坐埋一齊就可以。


至於立法會大樓嘅議員辦事處，連任者就唔使搬，民主黨就慘啲，原本有8個議員，家得番6個，要嘔返兩個辦公室出嚟。


另邊廂，商務及經濟發展局長蘇錦樑好識做，噚日已經分別同旅遊界姚思榮、資訊科技界莫乃光見面，莫乃光話會議大約一小時，大家交流業界關注嘅議題，佢覺得非常有用。