藝發局唔理民意投馬逢國

【明報專訊】周俊輝今屆挑戰體育、演藝、文化及出版界，選舉結果塵埃落定，周俊輝獲477票，馬逢國（圖）以1106票無驚無險當選。不過，周俊輝有份成立嘅工廈藝術家關注組，喺選舉前發起「一人一信」行動，呼籲一班無選票嘅藝術家去信香港藝術發展局，表明自己支持邊個候選人，希望手執寶貴一票嘅藝發局，以藝術家嘅意願為基礎去投票。


20委員凌駕141藝術家

藝發局前日終於就「一人一信」行動，回覆工廈藝術家關注組。藝發局喺書面回覆話，收到嘅「一人一信」，有141人話希望投畀周俊輝，另外兩名候選人馬逢國同蕭思江就一票都無，另有3人話投白票。雖然藝發局話，已經將統計結果通知藝發局20幾名委員，但藝發局最終根據委員內部投票結果，有13人支持馬逢國，4人支持周俊輝，5人投白票，所以藝發局行政總裁周勇平按照委員內部投票結果，代表藝發局投畀馬逢國。


藝發局呢封書面回覆喺facebook熱傳，好多人批評藝發局係「意見接受，態度照舊」，形容係白紙黑字扭曲民意咁話。Emily覺得，既然有藝術家咁唔滿意，藝發局都應該清楚解釋吓佢嘅投票決定。