花旗：借錢男多女一倍

【明報專訊】經濟唔好，衣食住行又愈嚟愈貴，唔知大家有冇向銀行借錢呢？花旗噚日公布香港人嘅貸款調查，有幾個結果就令小琴大跌眼鏡！女人要買衫買袋同化妝品，畀人「洗腳唔抹腳」嘅感覺；男人就好似穩陣啲。不過原來有借錢嘅男士比女士多近1倍！


花旗銀行信用卡及無抵押信貸業務董事總經理伍楊玉如（Maggie）話，因為男人要擔起頭家，所以使費會多啲，需要同銀行周轉喎。


另外，計正每個月人工少啲嘅人，借錢嘅需要應該更加大。但研究又發現，原來每個月搵4萬蚊以上嘅人，反而更加需要借錢！


月入4萬以上 更需借錢

呢個時候又要Maggie解畫，佢話月入4萬以上嘅人，都鍾意做吓投資，又或者試吓自己創業，所以就要問銀行借錢。都係嘅，如果人工少，分分鐘還唔到錢，咁咪好大鑊！畀着係小琴都唔會借啦。


至於借錢嘅用途，最多人話係借嚟讀書或者進修，多數都係後生仔。問銀行而唔係政府借錢讀書都幾危險，如果畢業搵唔到工，又或者進修之後搵唔到工，容乜易冇錢還㗎！


Maggie又話香港人多數有口齒，就算要去做兼職又或者臨時工，都會盡力還錢畀銀行。佢仲話成個巿場只有3%嘅金額被拖數，只係小數目。


調查仲發現，多數做分期付款嘅人，都係買電子產品嘅後生仔。分期付款都係欠債嚟㗎，各位買iPhone 5時，要諗清楚喇。


email:piano@mingpao.com