議員十一埋位 雙十宣誓

【明報專訊】70名立法會議員將於10月10日宣誓，但佢哋嘅任期，其實喺10月1號起就開始，近日佢哋除咗慶功、休息，好快就要收拾心情準備開會。佢哋下周五將先到立法會睇環境，呢個月25號下午就要傾座位問題。


添馬新立法會大樓，早就準備議員數目增加，上屆60席，其實會議廳最多可以容納120名議員，因此家70席當然無問題。除咗會議廳，用作開內務委員會同財務委員會嘅「會議室1」，都要傾吓點坐，有獨立議員就話等大黨先揀。


話說回頭，立法會秘書長吳文華將於呢個月28號最後一日工作，其實家候任秘書長陳維安都已經返工，相信兩人可以順利交接。至於議員雞精班應該喺本月底24至27號舉行。


傳葉太田大少入內會

雙十節當日係議員宣誓之時，屆時更會選舉立法會主席。另外，內會正、副主席劉健儀同李華明不再連任，除咗早前有說陳健波有機會做副主席，坊間盛傳新民黨主席葉劉淑儀做內會主席，但若葉太要入行政會議而不能當內會主席，有人就話自由黨榮譽主席田北俊係人選之一。不過，葉太不在港，田少忙於謝票，噚日未能聽吓佢哋點睇呢單消息喇。