特首撐粵語運動？

【明報專訊】特首梁振英噚日帶住成班高官去廣州，同廣東省官員一齊出席粵港聯席會議，上午先同省委書記汪洋見面，汪洋大讚梁振英係歷任特首最熟悉廣東事務，因為佢喺1970年代已經去廣東參與改革開放喎。


被讚最熟廣東特首

CY下午就同廣東省長朱小丹等官員開會，之後仲一齊見記者。CY上任幾個月，其實朱小丹亦接任省長唔算耐，兩人都係首次主持粵港聯席會議。CY見去到廣東省都撐粵語，雖然唔係佢主場，但記者會上就話，在場有好多係香港記者，所以佢都係用廣東話發言。朱小丹都響應CY一陣，用咗幾句廣東話講幾句開場白，但好快就轉台用番普通話喇。


聯席會議開咗成日，兩地記者都等到呆，但兩人見記者都係得20分鐘，答咗幾條問題就收工，發問嘅幾乎全部都係內地媒體或駐廣州行家，北上採訪嘅港記一條都無得問。Emily聽聞，呢個記者會係粵方主持，內地新聞辦早一日已經要求內地記者提交問題，仲經過篩選，Emily同埋一眾行家只係白舉手，然後一肚火返香港。