維園阿伯搞㷫長毛

【明報專訊】每逢星期日喺維園舉行嘅《城市論壇》，都多數有一班出名火氣大嘅「維園阿伯」捧場，追住「賣國漢奸」大罵一餐。噚日「長毛」梁國雄踩入論壇，梗係成為箭靶，被多個「愛國」阿伯圍攻，話長毛反中亂港；到廣告時段收咗咪，言論更「精彩」，阿伯連長毛母親也「問候」，認真無禮！


長毛初時都笑笑口咁回應維園阿伯嘅指控，但之後其中一個阿伯竟然以粗言穢語罵長毛母親，長毛聞言即時動真火，立即反擊，指住維園阿伯反駁，話佢哋根本就唔係真正愛國，只係得個講字。噚日下晝咁啱喺香港有保釣遊行，長毛就「兇」阿伯﹕「如果你一陣過去參加保釣遊行，我就話你叻！」雙方不停對罵，火花四濺，就連見慣大場面嘅主持謝志峰都無晒計，㩒都㩒唔住佢哋。