煲呔前大將「流落」油尖旺

【明報專訊】特首曾蔭權落任一排，當年喺特首辦嘅公務員，大部分已經有新崗位，最新公布嘅係前特首辦助理處長（傳媒）何小萍（Betty），佢由中環政府總部「流落」民間，做油尖旺民政事務專員，負責搞地區事務同埋處理區議會關係。


Betty喺特首辦其實唔算做得好耐，Emily無記錯嘅話，佢只做咗1年左右，但佢專職同傳媒打交道，而曾蔭權臨尾發生豪飲豪食豪搭飛機事件，Betty要幫「老闆」解畫，真係做到氣咳！

今次調到地區工作，性質同特首辦完全唔同，但特首梁振英話民生無小事，又話要放權畀地方，Betty都不乏機會發揮。講開前特首辦，曾蔭權嘅私人秘書甯漢豪已去咗做地政總署署長，前特首辦主任梁卓偉返港大醫學院教書；前特首辦特別助理陳岳鵬，就去咗政制及內地事務局做政治助理。