林健鋒田少隔空過招

【明報專訊】2008年時出走自由黨自立門戶嘅經濟動力林健鋒（Jeffrey），噚日同自由黨榮譽主席田北俊隔空過招，喺打擊水貨客方面，佢話田少之前向政府提出嘅方法根本「行唔通」，佢自己就有條「妙計」畀政府。兩名立法會議員嘅計仔邊個行得通，大家不妨評下理。


成功重返立法會嘅田少未上任就積極「出招」，前日主動寫信畀保安局，話家水貨客濫用「一簽多行」簽證，建議政府應該限制內地旅客淨係可以「一日一行」，咁就可以打擊水貨客咁話。Jeffrey噚日就話唔贊成，佢話如果限制內地人「一日一行」，水貨客雖然唔可以一日走幾轉，但佢哋背後嘅大判頭唔會坐以待斃，會搵多幾個水貨客幫手，結果只會令到更多水貨客迫爆上水，弄巧反拙。


倡列黑名單禁過關

咁Jeffrey又有乜「妙計」？佢話，政府應該同內地當局傾，將經常一日過境幾次、而又無正當職業嘅內地人列入黑名單，唔好咁輕易批准佢哋過關。


另外，Jeffrey又透露，家招攬緊志同道合嘅候任立法會議員加入經濟動力，但佢就唔肯透露「目標人物」係邊幾個，又話要遲啲確定咗先講。經濟動力梁君彥盛傳會爭做立法會內務委員會主席，佢噚日無正面回應呢件事，仲講笑咁話睇吓內委會主席忙唔忙，先至決定做唔做喎。