兩棲議員又要飛

【明報專訊】立法會下月10號開鑼，當日除咗70名議員要宣誓，亦會選出新一屆立法會嘅主席同內委會正、副主席。今次立法會大換血，身兼全國人大代表嘅議員數目亦唔少，除咗連任嘅黃國健、葉國謙，仲有馬逢國、廖長江、吳亮星同田北辰。今次立法會開鑼，撞正港區人大去雲南考察，所以佢哋10號開完會，相信要立即飛去雲南。


呢班人大代表都會好忙，開完會就即刻出差，到15號先返港，16號立法會又再開會，將會就各個事務委員會選主席。


目前建制派有意推舉經濟動力梁君彥做內委會主席，至於過去由民主黨李華明擔任嘅內會副主席，建制派就無意同民主派爭，希望維持平衡咁話。財委會方面，若果由吳亮星同民主黨劉慧卿爭，相信吳亮星勝出嘅機會都幾高。