莫乃光范國威升呢

【明報專訊】萬眾期待嘅iPhone5終於喺上星期正式亮相，不過今次iPhone5似乎欠新意，令唔少蘋果迷大失所望。雖然如此，唔少候任立法會議員仍然話想買，新民主同盟范國威係忠實蘋果迷，佢話早喺大學時代、即20幾年前，就已經用「Mac機」電腦。不過，呢個資深蘋果迷都話對iPhone5確有少少失望，但作為多年嘅粉絲，點都要繼續捧場。


候任資訊科技界立法會議員莫乃光（Charles）非常快手，已經向電訊商訂購iPhone5。佢笑言自己其實只係貪新鮮先至買，暫時未知新機幾時到手。佢仲話，雖然對iPhone5有啲失望，但iPhone5處理器速度較上一代快，而且支援4G服務，佢都想試吓4G上網有幾快。民建聯李慧琼就穩陣啲，佢家用緊iPhone4S，暫時未有打算換iPhone5，話要睇吓其他人試用後嘅評價先。


另外，毛孟靜之前表明想做立法會資訊科技及廣播事務委員會主席，Charles話佢都有意競逐該會主席或副主席，但要等埋下星期泛民飯盒會，睇吓泛民如何協調先至決定。