方國珊諷田少 好彩先贏

【明報專訊】早前有報道指，民建聯懷疑以車接載長者到票站投票，而且喺長者手掌貼咗民建聯候選人嘅名單編號。方國珊（Christine）早前就呢宗「掌心雷」疑雲到廉署投訴，佢噚日再到廉署錄口供。Christine話，聽聞廉署總共收到逾千宗有關「掌心雷」事件嘅投訴，反映好多市民都非常不滿呢種做法。


民協曾招攬 暫時唔入黨

退出咗自由黨嘅Christine喺今屆立法會選舉高票落選，僅僅輸畀新民主同盟嘅范國威，就連佢嘅自由黨「舊主」田北俊（田少）都讚佢叻女。Christine噚日話會繼續做好地區工作，未決定下屆會唔會捲土重來。佢又多謝田少嘅讚賞，但又不忘講多句，話佢叻女田少應該一早就知。Christine仲話，田少毫無地區工作，嘲諷佢今次贏到只係好彩喎。


相反，Christine就讚前自由黨黨友劉健儀（Miriam）議政能力高，值得進入立法會，仲話如果Miriam唔係揀只有7席嘅港島區，改而選擇出選有9席嘅新界東，就好大機會當選。Christine覺得田少商界背景濃厚，唔應該參加地區直選，轉去商界功能組別會好啲。


另外，Christine透露，民協馮檢基喺選舉前曾經向佢伸出「橄欖枝」，邀請佢加入民協，但佢暫時都唔想加入政黨，仲話政黨有時會變成自己嘅「負資產」。