蔣麗芸怕變黃面婆

【明報專訊】立法會下個月才正式開會，不過，17名新貴議員噚日就去咗立法會tour，熟悉一下呢座新大樓，其中，女議員唔多唔少都會顧及儀容，民建聯蔣麗芸（Ann）喺議事堂問，燈光會唔會影得佢好黃。職員解釋話，議事堂上面燈光已經調校，睇嚟Ann唔使怕影得佢老啦！模擬投票時，Ann就有少少蝦碌，唔太清楚議案要過半數先通過，佢話對於功能界別同直選票數有啲亂。


何俊賢：上任似等太太生仔

唔少新議員對新一屆議會有好大期待，漁農界嘅民建聯何俊賢話，佢好似小學生心態咁參觀大樓，對於即將上任，佢話好似喺產房等太太生仔，「我未試過生仔，所以我都好緊張」。新民主同盟范國威（Gary）就話，新大樓守衛森嚴，多咗好多保安，好多地方都去唔到，佢話會同秘書處反映。


除咗立法會tour，由下個星期一至四，立法會秘書處會搞俗稱「雞精班」嘅簡介會，等新議員熟習議會運作。