中燃「慶功宴」預祝抗收購

【明報專訊】新奧能源（2688）舊年底聯同中石化（0386）話要收購中國燃氣（0384），家過咗大半年，仲未有聲氣。中燃噚日就請小琴同班行家食飯，話就話講吓公司發展，其實就係慶功。點解咁講？因為佢哋揀咗間叫「慶公宴」嘅私房菜，席間仲頻頻乾杯，喜氣洋洋。


小琴仲聽講，中燃班管理層前晚已經約埋成班賓架去打邊爐，似乎大家都一身鬆晒。無計啦，呢大半年嚟佢哋好忙，為咗對抗呢單敵意收購，準備咗好多文件，市場上又不斷有黑材料流出，證監仲要求作出解釋。


中燃副董事總經理梁永昌話，家證監定咗對方最遲10月15號一定要發正式要約，佢希望成件事快啲完，到時就可以真正咁去慶功。不過，如果對方唔加價都決定照上馬，佢哋又有排煩，分分鐘到年尾都無假放。