何秀蘭想選內會副主席

【明報專訊】今屆立法會有唔少資深議員退下，各委員會正副主席嘅佈局將會大洗牌。喺建制派議席大壓泛民之下，經濟動力梁君彥幾乎篤定喺冇對手下出任內務委員會主席，聽聞工黨何秀蘭亦有意競逐內會副主席，以保住泛民嘅聲音。


至於各個事務委員會，所有黨派都積極搶攻。工聯會神級人物陳婉嫻重返議會，計劃爭奪福利事務委員會主席，料與工黨社福界議員張國柱對撼。至於上屆係房屋事務委員會副主席嘅王國興，今屆就希望「更上一層樓」做主席，民主黨胡志偉能否繼承黨友李永達衣缽做主席，真係未知之數。


葉劉避前同事唔搶灘

向來跟開保安事務嘅民建聯劉江華大熱倒灶，坊間有傳做過保安局長嘅新民黨葉劉淑儀有意「搶灘」。不過，葉太同Emily講，佢仲有好多前上司同下屬仲喺保安局做，為免尷尬，佢只計劃競逐公務員事務委員會。