阿人瑞士被摸髀唔曉叫

【明報專訊】瑞士日內瓦風光明媚，但治安又係點呢？分別跟進《香港殘疾人權利公約》同內地民運人士李旺陽離奇上吊事件嘅民主黨劉慧卿及支聯會主席李卓人，日前雙雙赴日內瓦游說聯合國，點知繼卿姐被人強搶手袋後，阿人堂堂大丈夫被人摸大髀。光天化日，咁都得？


幸保不失 但感覺好差

話說卿姐日前抵達日內瓦無耐，準備去《香港殘疾人權利公約》講座途中，突然被匪徒搶手袋，好彩隨行同事反應快，途人又熱心幫手，最後合力幫卿姐追番個手袋。


而阿人嘅「慘痛經歷」就有啲唔同，佢憶述有一日坐巴士期間，突然感覺身旁有個男人向佢施以「鹹豬手」，喺佢大髀上摸摸吓，「我初初以為畀人非禮，但後尾發現佢係想摸我個褲袋，想偷我嘢，我即時將隻手按住個褲袋！」

雖然幸保不失，但阿人話蝕底被摸「感覺好差」，「我冇嗌出聲，不過真係幾陰功！」睇嚟政府嘅宣傳廣告，都要教埋男士遇到侵犯時，都要識得叫「唔好」呀！

講番日內瓦之行，阿人已按聯合國人權監察機制反映李旺陽事件，呼籲聯合國向中國政府正式提出申訴，要求中方交代。阿人話，如果今次申訴成功，聯合國將會喺下年3月發表嘅人權理事會報告上記錄李旺陽事件，算係「立此存照」，屆時佢可能會再到聯合國游說班理事喺大會上就事件發言，逼令在場中國代表回應。