彤叔入養和 名人現身

【明報專訊】87歲嘅新世界發展創辦人鄭裕彤（彤叔）目前仍然喺跑馬地養和醫院留醫，一眾記者行家每日都喺養和外面守候。噚日星期日，Emily嘅同事就喺養和外見到唔少政商界名人出入，唔知佢哋係咪都去醫院探彤叔，還是去睇病？


噚日上午11點左右，彤叔個仔、新世界主席鄭家純現身養和，大約逗留40分鐘離開；到咗下午約3點，記者見到工業家蔣震現身，佢笑容滿面咁同在場記者揮手，見到佢隻手戴住病人手帶，相信唔係嚟探病，唔知喺咪返上病房休息。而差唔多同一時間，大家樂集團主席陳裕光亦到養和。


到夜晚7點，早兩年曾經同彤叔一齊投資「哈薩克香港發展基金」嘅隆源主席榮智健，以及目前官司纏身嘅南華足主羅傑承亦先後現身養和，逗留咗一段時間先離開，兩人同彤叔都有一定交情，唔知係咪嚟探佢呢？不過兩人無接受訪問就離開咗。