劉江華出道戰友開P賀落選

【明報專訊】民建聯劉江華落選至今兩個星期，唔好以為所有「慶祝」活動已經完結，日前就有一班沙田街坊，自發喺乙明邨搞party，成枱食物之餘，連橫額都印埋，「普天同慶劉江華落選」9隻字，離遠已經望到。


不過，呢班街坊唔係「高登仔」，而係中年街坊。聽當日喺現場嘅新民主同盟丘文俊話，原來呢班街坊係乙明邨剛建邨年代嘅互委會，亦係劉江華政途上嘅第一代戰友，當年劉江華就喺乙明邨做地區工作起家。


曾幫劉搭路 「現解開心結」

佢引述班街坊講，當年仍屬港同盟嘅劉江華剛出道，沙田根本冇人識佢，正係呢班街坊幫佢搭路，可惜其後劉江華「變節」轉投民建聯，佢哋就耿耿於懷到家。如今劉江華落選，總算解開咗佢哋多年嘅心結咁話。