嫻姐少理釣島照遊日

【明報專訊】中、日仍就釣魚島主權爭議關係緊張，早前工聯會候任立法會議員麥美娟建議，香港應該向日本發出黑色旅遊警示，話香港人去日本會唔安全，更加係「唔公義」，又話應該經濟抵制日本。呢番言論惹起好大爭議，麥美娟事後死撐，話呢個建議係工聯會社會事務委員會決定。不過，Emily就聽聞，啱啱當選立法會議員嘅工聯會榮譽會長陳婉嫻就一於少理，選舉過後去咗日本玩。


「九一八前出發 氣氛無咁緊張」

唔通嫻姐都覺得麥美娟嘅建議無道理，所以唔理工聯會建議，照樣去日本旅行？嫻姐身邊人就話，其實嫻姐今次去日本，喺3個月前已經做好計劃，打算選舉過後去日本行山睇風景，休息一陣，仲強調嫻姐早喺「九一八」之前已經出發，當時中、日關係同氣氛都無咁緊張，所以如期出發，嫻姐家已經返咗香港喇。


Emily噚晚搵唔到嫻姐同麥美娟回應，不過，既然嫻姐一早計劃咗去日本，或者工聯會發表立場時，都應該事先了解領導層動態，無謂出現雙方都尷尬嘅情况。


不過，反日風潮之下，唔少人提起去日本都停一停諗一諗，早前有旅行社話，日本團報名人數急跌幾成，唔少原本報咗名團友有人要求退團，又或者轉報其他國家嘅旅行團。