蔣麗芸宣誓唔肯揸聖經

【明報專訊】新一屆立法會即將開鑼，噚日大約20個議員到立法會參加示範宣誓儀式，當中不少係未試過宣誓嘅新丁議員，好似民建聯蔣麗芸（Ann）、自由黨易志明等。不過，身為天主教徒嘅Ann，練習宣誓時拒絕舉起《聖經》，搞到在場人士都滿腦問號。


「神與你同心」

阿Ann冇正面回應點解唔揸住本《聖經》，只係好玄咁話﹕「只要心目中有神，無論用邊個版本，佢都會同你個心一齊。」有人就質疑，唔通阿Ann擔心日後喺議會做啲嘢，會有違天主嘅意思？


過去人民力量同社民連嘅議員都會修改就職誓詞或加插語句。


噚日喺現場嘅人力「慢必」陳志全話，暫時未計劃會唔會喺宣誓當日搞事，至於會唔會改誓詞，就要再同黃毓民及陳偉業商量。