洪綺敏重遇CY係咁笑

【明報專訊】梁振英（CY）參選特首期間，每日著到花枝招展、陪住CY做助理嘅前新聞主播洪綺敏（Cathy），喺CY上任後離開候任特首辦，沉寂咗一排。外界曾經傳佢轉投新世界，但最後發現係流料，事關佢噚日以中國商會副總幹事身分現身酒會，仲遇到舊老闆CY。


任中國商會副總幹事

新聞界噚日舉行國慶酒會，請得CY同中聯辦副主任李剛出席。由於中國商會有份贊助酒會，Cathy代表商會上台接受感謝狀時，仲好開心咁主動同CY握手，笑到見牙唔見眼。


雖然話係新聞界國慶酒會，但喺呢啲派對，又點會係記者嘅主場？噚日主辦單位就着保安以連綿嘅鐵馬同圍欄，間住喺出入口等候CY嘅記者，即使喺會場內，同樣以重重關卡困住記者，有行家講笑咁問保安﹕「你哋會唔會用埋水馬？」

至於CY同民政事務局長曾德成，即使出席呢個新聞界酒會亦冇畀面業界，事關佢哋同班左派傳媒高層寒暄一番後，面對前線記者觸及啟德發展以及新聞自由等不同嘅提問，一句都冇答就走人。