雅居樂香港賣樓 送鮑魚

【明報專訊】新屋入伙要大宴賓客，一路都係廣東、港澳民間嘅特色傳統。不過，發展商出錢幫業主擺入伙酒，各位又有冇經歷過呢？


話說雅居樂（3383）下個月要來香港搞為期10日嘅「20周年地產聯展」，除咗同大家推銷樓盤之外，喺禮物方面落咗不少心思，準備咗「十大優惠」。不過呢，喺禮物清單之中，小琴印象最深竟然係「鮑魚大禮包」同埋「入伙喜宴」，不單止因為本人為食，更加因為小琴感歎：雅居樂果然係廣東中山出身，對港人嘅喜好心中有數。如果係北方地產商，就算送人參、鹿茸呢啲貴重嘢，都未必咁啱心水。


如果睇今年銷售業績，雅居樂前8個月賣樓賣咗184億（人民幣．下同），喺內房股入面算中規中矩，不過就少過集團上年同期嘅201億。今次趁過生日派大禮包，應該都希望喺香港打翻場靚仗，唔知家陣公司信心如何、會準備定幾多只鮑魚呢？