施偉賢追思彌撒猛人多

【明報專訊】立法局（家叫立法會）首名由議員互選嘅主席、御用大律師施偉賢上月去世，家屬噚日喺中環堅道聖母無原罪教堂舉行追思彌撒，唔少政界同法律界名人都去送別佢。終審法院前首席法官李國能同Emily講，兩人早喺70年代認識，當時兩人嘅大律師事務所都開喺同一層。


曾與Martin玩話事啤

李國能喺儀式上致悼辭，透露施偉賢原來同前立法會議員李柱銘（Martin）以及其他律師一齊玩話事啤。施偉賢又係愛馬之人，養咗26隻馬，其中一隻馬「確叻」仲係1976年香港打吡冠軍。本來，施偉賢以為「確叻」耐力唔夠，不過佢太太堅持畀「確叻」出賽。可惜，現居英國嘅施偉賢太太健康欠佳，嚟唔到香港送別。


另外，立法局1984年討論支持《中英聯合聲明》草擬本，嗰時係立法局議員嘅施偉賢投棄權票，因為佢覺得英國政府封咗香港人居英權後路。


噚日出席嘅仲有繼施偉賢做立局主席嘅黃宏發（發叔）、兩任立法會秘書長吳文華同陳維安，前立法局首席議員李鵬飛、兩任律政司長黃仁龍同袁國強等。發叔話一直都好尊重施偉賢，認為佢做主席好公正，樹立好榜樣。