漁署統一制服認住太陽帽

【明報專訊】漁護署轄下360名執法人員今日齊齊換新制服，襯衫同長褲顏色都會統一，包括米白色襯衫、灰藍色長褲，佢哋仲會戴上繡咗漁護署徽號嘅太陽帽（圖），方便市民識別。


漁護署中人同Emily講，以往署內各部門自己顧自己，各自為執法人員設計制服，例如農林督察嘅襯衫係褐色、長褲綠色，好似有保護色咁，海岸公園後期成立，襯衫變咗白色，好有陽光氣息，但會令人混淆，所以部門商量點樣統一制服。另外，為咗識別唔同職級，漁護署亦好似其他執法部門咁，用肩章嘅條紋數量去顯示，由1條至4條不等。


Emily覺得，漁護署設計嘅新制服有啲似食環署小販管理隊，都係淺色衫配深色褲，膊頭同樣有肩章，分別在於漁護署制服多咗條呔，同埋頂帽係鴨舌帽，喺戶外工作可以遮擋太陽，有實際作用。


（政府新聞處）