曾鈺成做梗立會主席

【明報專訊】政圈一直盛傳民建聯曾鈺成會競逐連任新一屆立法會主席，呢個「公開嘅秘密」噚日終於獲得「官方確認」。民建聯噚日召開黨團大會，通過由曾鈺成披甲出戰角逐主席寶座。泛民雖然有意派出公民黨黨魁梁家傑競逐，但因為建制派對此已有默契，所以只有27票嘅泛民睇嚟好難阻到曾鈺成連任。


泛民只得27票

至於保安事務委員會主席一職，據悉建制派話唔多滿意原主席嘅民主黨涂謹申過去4年嘅表現。民建聯葉國謙話，佢會代替敗選嘅劉江華挑戰涂謹申，而民建聯主席譚耀宗就會競逐連任政制事務委員會主席。噚日民建聯嘅黨團會議，仲要求該黨所有立法會議員，除非有特別原因，否則人人都要加入至少5個委員會，務求可以喺所有委員會夠人「插旗」，以後有需要時就可以幫政府一把咁話。


立法會「新丁」之一嘅葛珮帆同Emily講，黨團會議決定要佢加入6個委員會，佢都擔心自己做唔嚟，希望可以減一個。佢話，原本黨方仲希望佢加入司法及法律事務委員會，即係總共7個委員會，但佢即刻話自己對法律一竅不通，先至推得甩。不過，另一名「新丁」鍾樹根就可能要做足7個委員會。黨團仲三申五令，要求所有議員不能中途退出委員會，更唔畀議員出席會議報到後就走人，要佢哋乖乖坐喺度開會。


民記議員人人要入5個會

另外，建制派經過一輪協調，民建聯終於支持由經濟動力梁君彥角逐內務委員會主席。至於財務委員會主席，因為吳亮星同自由黨張宇人都有意，經協調後，民建聯支持佢哋兩個輪住做主席，每人做一年，第一年就由張宇人打頭陣。不過，由於民主黨劉慧卿會爭連任，所以可能會有變數。