馬會大廚龍蝦攞金獎

【明報專訊】馬會餐廳一向係名人食堂，噚日旅遊發展局嘅「美食之最大賞」決賽，賽馬會跑馬地馬場滿貫廳嘅林勸飛師傅，憑一道「四喜煙燻龍騰薈」贏得今年「龍蝦組」至高榮譽金獎。至於御苑皇宴嘅尖沙嘴同九龍灣店，亦分獲「龍蝦組」同「牛肉組」嘅至高榮譽金獎。


入行25年 曾獲此獎

「四喜煙燻龍騰薈」用龍蝦做主材料，以3種烹調方式炮製，包括龍蝦頭同觸鬚拆肉，加菇、菜用腐皮包住煙燻，龍蝦尾同黑虎掌菌油泡，龍蝦肉炸脆配桂花汁。林師傅入行25年，2010年亦曾喺同一比賽得獎。市民想食得獎菜，可以下個月去滿貫廳捧場。


至於御苑皇宴嘅尖東店，憑「龍虎風雲會」得到「龍蝦組」至高榮譽金獎，同馬會大廚分庭抗禮。御苑皇宴九龍灣店仲憑「牛氣十足」獲至高榮譽金獎，至於朗豪酒店明閣嘅「松露和牛禮物盒」亦獲同一獎項。