立會悼念 一半議員缺席

【明報專訊】噚日全港哀悼，特區主要官員齊集政府總部致哀；添馬艦另一邊嘅立法會大樓，同樣喺中午時分，由新任立會秘書長陳維安率領默哀。不過，70名議員中有一半人缺席，但點解呢場悼念活動都仲有百幾人參加呢？


公民黨齊人 建制派出席率高

建制派議員向來缺席悼念六四亡靈儀式，但今次海難不涉政治立場，佢哋嘅出席率明顯較泛民好。民建聯、自由黨同新早餐派幾乎總動員到場；新民黨「孖寶」葉劉淑儀同田北辰亦有到，唯獨總共3人嘅經濟動力無派代表。經濟動力召集人林健鋒話，佢哋當時都要開會，只能喺各自嘅工作崗位上致哀。至於同樣缺席嘅工聯會王國興就話，當時正同港燈高層以電話跟進事件；謝偉俊就話要上律師會課程，否則冇得延續執照。


泛民各大黨派都派人出席，公民黨最齊人，民主黨只得涂謹申同劉慧卿兩人。聽講民主黨前主席何俊仁得悉默哀安排後，曾嘗試更改時間表參加，可惜未能如願。


雖然得一半議員出席，會場就有百幾人，因為有立法會職員同埋一班K3學生。呢批小朋友有30幾人，係天水圍聖公會夏瑞芸幼兒學校學生。佢哋默哀後，喺學校社工帶領下為死難者祈禱，唔少隨團教師同家長聽到佢哋以充滿童真嘅聲音禱告，忍唔住感觸落淚。


校長謝玉鳳話，學校早幾個月已計劃帶小朋友參觀中環碼頭後再去立法會。教師喺今次海難後，一度諗過唔去中環碼頭，以免觸景傷情，但最終都決定堅持，希望藉此教育小朋友要勇敢面對困難。