謝偉銓想入政制委會

【明報專訊】臨近立法會復會，泛民同建制就小組委員會嘅插旗戰漸見白熱化。建築、測量及都市規劃界立法會議員謝偉銓，噚日放風話想加入政制事務委員會，主要原因係業界都好關注功能組別日後點產生，至於係咪取消功能組別，亦唔係一個「yes or no」問題，唔同階段點樣做法都好重要。


講到新界東北發展，Tony話，佢嘅大原則係「發展有咁嘅需要」，認為成個發展已諮詢咗4年，唔少人都認受咗，應該「接受過去再調整」。若果推倒重來，將會係「永無止境」，想增加供應亦會更困難。佢自己亦會爭取加入房屋事務委員會，同做發展事務委員會副主席。


至於被標籤「梁粉」，Tony話，當初提名梁振英，已經講明係為咗支持「有競爭選舉」，後來支持佢，亦唔係得佢一個。Tony強調會因應政策決定支唔支持政府，唔會因為梁振英一個人支持。


佢又話，本港有關發展嘅條例，唔少自70年代以來已無全面檢討。例如近年流行開放式廚房，以前嘅消防規例就規定要有間格。入到議會推動業界，睇吓啲條例有無過時，會係佢首要工作之一。