新聞類別
財經
詳情#
【明報專訊】分析員嘅工作，就係睇實公司盤數，惜住客仔「芬佬」嘅荷包；不過小琴發現，有啲體貼嘅分析員，仲會惜埋客仔嘅健康！話說有一位中資行嘅分析員，喺中秋節前一日出咗份報告，除咗例牌祝「芬佬」客仔中秋節快樂之外，仲附送一個愛心小貼士，提醒大家唔好食咁多月餅，因為每100克月餅嘅熱量，要跑足半個鐘先可以消耗到喎。
過節之前收到呢啲溫馨小提示，相信一眾芬佬心都甜埋。不過原來愛心提示唔係節日限定，假期過後，健康小貼士陸續有嚟！最近佢又提醒大家，趴喺枱面瞓覺，又或者係搭車同搭飛機時坐喺位度瞓覺，對頸椎嘅傷害係好大㗎。佢建議大家，如果頸椎唔舒服，最好係做運動，尤其係游水。
香港人多數鍾意去揼骨鬆一鬆，不過佢話如果撞正手勢唔好嘅師傅，只會有反效果。值得留意嘅係，佢指明話深圳好多按摩師傅唔夠專業，叫大家盡量唔好幫襯。咦，唔通好多芬佬都鍾意上深圳揼骨？
跟開醫藥板塊 本業亦無鬆懈
呢個分析員咁體貼，又咁注重健康，可能同佢跟嘅醫藥板塊有關。除咗成日提供愛心小貼士，佢本身啲功課都做得好足㗎，三日唔埋就會收到佢啲報告，仲分析得好詳盡。家投資銀行面臨裁員潮，仲裁到去分析員邊，搞到個個都提心吊膽。睇呢位分析員都要教佢同行點樣減壓先得，不過記住唔好去深圳骨喇。
email:piano@mingpao.com
回應 (0)
