仁濟鄭承隆做新民黨副主席

【明報專訊】新民黨喺立法會選舉有進帳，議席多咗，但資金始終爭啲。為咗進一步發展，黨主席葉劉淑儀近期拉攏到家底豐厚嘅仁濟醫院主席鄭承隆（圖）入黨，噚日該黨中委會委任佢做埋副主席，速度之快，令唔少新民黨人都打個突。


黨需資金 鄭想涉足政治

有傳鄭承隆家族從事玉器生意，家底唔錯，多年來積極參與公益事務，又擔任監警會同中大新亞書院校董等公職，近年開始想涉足政治。鄭承隆有意入政黨，咁啱新民黨又需要資金，大家情投意合，但估都估唔到佢一入黨就做副主席。


新民黨都好識做，為呢個金主度身訂做「第二副主席」職位，資歷較深嘅史泰祖由副主席改為「第一副主席」，晉身議會嘅田北辰變成「常務副主席」。一個政黨有3個副主席，雖然葉太希望咁樣分餅可以做到家家歡喜，但Emily就聽講有人話新民黨好似變咗慈善機關化，事關出得多錢嘅人就可以輕鬆做總理、做副主席喎。