新聞處係筍盤 新竇盡覽維港

【明報專訊】以往Emily一聽到要到新聞處總部就即刻怕怕，皆因新聞處以前喺美利大廈，要行條大斜路。好彩新聞處最近搬咗新竇，新址喺上環海港政府大樓，用嚟開記者會嘅大房，打開窗簾，仲可以見到好大個維港海景！

5分鐘到政總

新聞處副處長梁黎艷明話，新址除近港鐵沿線，去新政府總部只需要5分鐘，所以好方便。呢個新址以前係海關用，但海關早前全部搬去北角新總部大樓，新聞處就即刻爭取，至於新聞處宣傳同推廣部門，就搬去北角政府合署。

管理美利大廈重皮

美利遲要變身酒店，查實早前唔少政策局已經搬離，新聞處早前獨力管理，已經非常「重皮」。美利記者會大房又長又窄，唔方便記者視線。新記者會大房就有維港全景，亦都大，唯一唔好就係有幾棟柱房裏面。

其實，若果大家有留意，新記者會大房已經出鏡，早前撞船意外救人英雄記者會，就係度舉行。