民主黨負責召開飯盒會

【明報專訊】泛民噚日召開飯盒會，傾咗新一屆飯盒會召集人人選，佢哋抽籤決定，首年由民主黨擔任，跟住3年就分別由獨立泛民、公民黨同工黨負責。民主黨代主席劉慧卿同Emily講，佢哋仲未傾邊個做召集人選，下個禮拜三左右至開會決定。


不過佢話，飯盒會係由黨召開，民主黨唔係一定要搵一個人做召集人，可能由黨友輪流擔任。另外，卿姐想競逐連任財委會主席，但就面對自由黨張宇人（Tommy）挑戰。卿姐同埋Tommy噚日都去信同僚，希望爭取支持。卿姐話，佢最近8年做咗7年財委會主席，又話以往暗票之下，有建制派議員投畀佢，有信心可以連任。


Tommy就話，呢幾日打畀不同黨派領導爭取支持，反問點解泛民一定支持卿姐。睇嚟今次財委會選舉會有一番惡鬥。